එක්සත් ජාතීන්ගේ අධ්‍යාපනික, විද්‍යාත්මක හා සංස්කෘතික සංවිධානයේ (UNESCO) ශ්‍රී ලංකා නිත්‍ය නියෝජිතවරිය වන මනීෂා ගුණසේකර මැතිනිය 2023 මාර්තු 21 වැනි දින පැරීසියේ යුනෙස්කෝ මූලස්ථානයේ දී එහි අධ්‍යක්ෂ ජනරාල් ඕඩ්‍රි අසෝලේ මැතිනිය වෙත සිය අක්තපත්‍ර ලිපි පිළිගැන්වූවා ය. අක්තපත්‍ර ලිපි පිළිගැන්වීමේ උත්සවයෙන් අනතුරුව අධ්‍යක්ෂ ජනරාල්වරිය සමඟ සාකච්ඡාවක් පවත්වන ලදී.
අධ්‍යාපනය, සංස්කෘතික උරුම, පරිසරය සහ විද්‍යාව යන අංශ ඇතුළත් හවුල් උනන්දුවක් සහ අදාළත්වයක් සහිත ක්ෂේත්‍ර සම්බන්ධයෙන් යුනෙස්කෝව සමඟ ක්‍රියාකාරී සබඳතාවක් පවත්වාගෙන යාම සඳහා ශ්‍රී ලංකාව සතු දැඩි කැපවීම තානාපති ගුණසේකර මැතිනිය විසින් යළිදු අවධාරණය කරන ලදී.
යුනෙස්කෝ සංවිධානය ආරම්භ කළ මුල් අවධියේ පටන් යුනෙස්කෝව සමඟ ශ්‍රී ලංකාව පවත්නා දිගුකාලීන සමීප සබඳතා පිළිබඳව සිහිපත් කළ තානාපති ගුණසේකර මැතිනිය, ශ්‍රී ලංකාව එක්සත් ජාතීන්ගේ සංවිධානයේ සාමාජිකත්වය ලබා 75 වසරක් සපිරීමේ සංවත්සරය 2024 වසරේ දී සැමරීමට නියමිත බවද සඳහන් කළා ය. ශ්‍රී ලංකාව යුනෙස්කෝව සමඟ පවත්නා දිගු කාලීන හා ශක්තිමත් සබඳතා, යුනෙස්කෝව දිගු කලක් මුළුල්ලේ සිය සාමාජික රටවල් සමඟ පවත්වන සබඳතාවන් හි සුවිශේෂීත්වය විදහා දක්වන බව අධ්‍යක්ෂ ජනරාල් අසෝලේ මැතිනිය විසින් සඳහන් කරන ලදී.
අදාළ ක්ෂේත්‍ර සම්බන්ධයෙන් ශ්‍රී ලංකාව යුනෙස්කෝව සමඟ පවත්නා සහයෝගීතාව සහ වත්මන් සහයෝගීතාව තවදුරටත් වැඩිදියුණු කිරීමේ ක්‍රමවේද පිළිබඳව ද මෙම සාකච්ඡාවේ අවධානය යොමු විය. ශ්‍රී ලංකාව යුනෙස්කෝවට ලබා දෙන වටිනා දායකත්වය සහ කැපවීම අගය කළ අධ්‍යක්ෂ ජනරාල් අසෝලේ මැතිනිය, යුනෙස්කෝව සමඟ ශ්‍රී ලංකාව පවත්වන අඛණ්ඩ සබඳතාව වෙනුවෙන් සිය සහයෝගය ලබා දෙන බව ප්‍රකාශ කළා ය.
තානාපති ගුණසේකර මැතිනිය ප්‍රංශයේ ශ්‍රී ලංකා තානාපති ධුරය ද හොබව යි. එතුමිය ශ්‍රී ලංකා විදේශ සේවය තුළ වසර 27ක අත්දැකීම් සහිත වෘත්තීයමය රාජ්‍යතාන්ත්‍රික නිලධාරිනියකි.
ශ්‍රී ලංකා තානාපති කාර්යාලය
පැරීසිය
2023 මාර්තු 28 වැනි දින
