බ්‍රසීලයේ ශ්‍රී ලංකා තානාපති කාර්යාලය බ්‍රසීලයේ ස්ථාපිත සාප්පු සංකීර්ණ ජාලයක් වන'පාඩියෝ බ්‍රසීල්' සමඟ එක්ව ප්‍රථම වරට ශ්‍රී ලාංකේය වෙළඳ සහ සංචාරක ව්‍යාපාර ප්‍රවර්ධන වැඩසටහනක් 2022 පෙබරවාරි මස 19 වැනි දින බ්‍රසීලීයා හි පිහිටි පාඩියෝ බ්‍රසීල් සාප්පු සංකීර්ණයේ දී පැවැත්වීය.
පාඩියෝ බ්‍රසීල් යනු බ්‍රසීලයේ පිහිටි විශාලතම සාප්පු සංකීර්ණවලින් එකකි. එහිදී විවිධ රසවලින් යුත් ලංකා තේ, කුරුඳු සහ කුළුබඩු, පොල් ආශ්‍රිත නිෂ්පාදන අත්කම් නිර්මාණ, මේස රෙදි සහ අත්‍යවශ්‍ය තෙල් වර්ග ඇතුළුව ශ්‍රී ලාංකීය නිෂ්පාදන ගණනාවකින් ශ්‍රී ලංකා කුටිය ප්‍රදර්ශනය කෙරිණි.
800කට අධික බ්‍රසීල ජාතිකයින් පිරිසකට මෙම වර්ණවත් ව සරසන ලද ප්‍රදර්ශන කුටිය වෙත පැමිණ විවිධ රසයන්ගෙන් යුත් ලංකා තේ සහ ශ්‍රී ලාංකීය ප්‍රණීත ආහාරපාන රස විඳීමට අවස්ථාව හිමිවිය. එමෙන්ම ශ්‍රී ලංකාවේ සංචාරක ක්ෂේත්‍රයේ විවිධත්වය පිළිබඳ තොරතුරු රාශියක් ලබාගැනීමට නරඹන්නන්ට හැකියාව ලැබිණි. මෙහිදී ශ්‍රී ලංකාවේ සංචාරක ව්‍යාපාරය පිළිබඳ වීඩියෝ දර්ශන විකාශය කිරීමට අමතරව පෘතුගීසී භාෂාවෙන් ශ්‍රී ලංකාවේ සංචාරක ව්‍යාපාරය හා සම්බන්ධ තොරතුරු පත්‍රිකා සහභාගීවූවන් අතර බෙදාදෙනු ලැබිණි.
ශ්‍රී ලංකා තානාපතිවරයා සමඟ බ්‍රසීලියාවේ පිහිටි පාඩියෝ බ්‍රසීල් සාප්පු සංකීර්ණයේ ජ්‍යෙෂ්ඨ විධායක නිලධාරීතුමන් සහ ඉහළ මට්ටමේ කළමනාකාරීත්වය, වෙළඳ මණ්ඩලයේ නියෝජිතයින්, සංචාරක ක්‍රියාකරුවන්, බ්‍රසීලියාවේ දූත මණ්ඩලයේ වෙළඳ කටයුතු සම්බන්ධ නිලධාරීන් මෙන්ම මාධ්‍යවේදීන් මෙම සමාරම්භක වැඩසටහනට සම්බන්ධ විය.
සමාරම්භක උත්සවයේ දී අදහස් දක්වමින් බ්‍රසීලයේ ශ්‍රී ලංකා තානාපති සුමිත් දිසානායක මැතිතුමා බ්‍රසීල ව්‍යවසායකයින් සඳහා ශ්‍රී ලංකාවේ වෙළඳ සහ සංචාරක ක්ෂේත්‍රයේ පවත්නා අවස්ථාවන් පිළිබඳව අවධාරණය ක‍ළේය. තවද මෙම දිවයින වෙතින් පිරිනැමෙන අනන්‍ය වූ සංචාරක අත්දැකීම් හේතුවෙන් ශ්‍රී ලංකාව සිය මීළඟ සංචාරක ගමනාන්තය වශයෙන් තෝරා ගන්නා ලෙස බ්‍රසීල ජනතාවගෙන් තානාපතිවරයා ඉල්ලා සිටියේය. මෙම වැඩසටහන සඳහා සම-සත්කාරකත්වය දැරීමට හැකිවීම සිය සමාගම ලද ගෞරවයක් මෙන්ම භාග්‍යයක් බව සඳහන් කළ පාඩියෝ බ්‍රසීල් සාප්පු සංකීර්ණයේ ඔගස්ටෝ බ්‍රැන්ඩාවෝ මහතා බ්‍රසීලියාවේ සුපිරි සාප්පු සංකීර්ණයන්හිදී ශ්‍රී ලාංකීය නිෂ්පාදන ප්‍රවර්ධනය කෙරෙන බවට තහවුරු විය.
ශ්‍රී ලංකාවේ හවුල්කාරීත්වයන් ගවේෂණයට බ්‍රසීල ප්‍රජාවන් සිදු කළ ඉල්ලීම් සඳහා තානාපති කාර්යාලයේ වාණිජ අංශය මඟින් නියමිත පරිදි සංවිධානය කෙරෙනු ඇත.
ශ්‍රී ලංකා තානාපති කාර්යාලය
බ්‍රසීලියා
2022 පෙබරවාරි 24 වැනි දින
