ඉරාන ඛනිජ තෙල් අමාත්‍යවරයාගේ ඇරයුමකට අනුව බලශක්ති අමාත්‍ය උදය ගම්මන්පිල මැතිතුමාගේ නායකත්වයෙන් යුක්ත නියෝජිත පිරිසක් 2021 සැප්තැම්බර් මස 24-27 දක්වා ඉස්ලාමීය ඉරාන ජනරජයේ සංචාරයක නිරත විය. ටෙහෙරානයේ ශ්‍රී ලංකා තානාපති කාර්යාලය බලශක්ති අමාත්‍යවරයා හා පැමිණ සිටි නියෝජිත පිරිස වෙනු‍වෙන් සාකච්ඡා සහ උත්සව අවස්ථා කිහිපයක් සඳහා පහසුකම් සැපයුවේ ය.
ඉරාන ඛනිජ තෙල් අමාත්‍ය ගරු (ආචාර්ය) ජවාඩ් ඔව්ජි මැතිතුමා හමු වූ උදය ගම්මන්පිල මැතිතුමා දෙරටෙහි අන්‍යෝන්‍ය අවශ්‍යතා පිළිබඳ ගැටලු සාකච්ඡා කළ අතර, දෙරටෙහි බලශක්ති සහයෝගීතාව තවදුරටත් ශක්තිමත් කිරීමේ ක්‍රම සහ ක්‍රම අධ්‍යයනය කිරීමට එකඟ විය.
ශ්‍රී ලංකාවේ දූත පිරිස ඉරානයේ මහ බැංකුවේ අධිපති ආචාර්ය අක්බාර් කොමිජානි මැතිතුමා ද හමු වූ අතර, ඔවුහු ඉතිරි ණය මුදල් පියවීම සඳහා දෙරට අතර යාන්ත්‍රණයක් ස්ථාපිත කිරීම සඳහා වන ක්‍රමවේද පිළිබඳව සාකච්ඡා කළහ.
ශ්‍රී ලංකාවේ නියෝජිත පිරිස ඉරානයේ ආර්ථික කටයුතු පිළිබඳ නියෝජ්‍ය විදේශ කටයුතු අමාත්‍ය මහ්දි සෆාරි මැතිතුමා හමු වූහ. දෙරට අතර ආර්ථික සහයෝගීතාව සඳහා ඒකාබද්ධ කොමිසමක් එකිනෙක රටවලට පහසු දිනයක කැඳවීමේ වැදගත්කම, මෙම හමුව අතරතුරදී දෙපාර්ශ්වයම අවධාරණය කළේය.
ශ්‍රී ලංකාවේ නියෝජිත පිරිස ටර්ක්මෙනිස්ථානයේ තානාපති ගුර්බනෝව් අහ්මට් කකබායෙවිච් මැතිතුමා සමඟ ද ඵලදායී සංවාදයක් ටෙහෙරානයේදී පැවැත්වූහ. ශ්‍රී ලංකාව සහ ටර්ක්මෙනිස්ථානය අතර වෙළඳාම, ආයෝජනය, බලශක්ති සහ සංචාරක ව්‍යාපාරය යන ක්ෂේත්‍රයන්හි සබඳතා ඉහළ නැංවීමේ අවශ්‍යතාව සාකච්ඡාවේ දී අවධාරණය කෙරිණි.
ගරු අමාත්‍යවරයා ටෙහෙරානයේ ශ්‍රී ලංකා තානාපති කාර්යාලයට පැමිණි අවස්ථාවේ දී, ඉරානයේ පුද්ගලික අංශයේ ප්‍රමුඛ පෙළේ ව්‍යාපාරිකයන් සහ සංචාරක ක්ෂේත්‍රයේ ප්‍රධානීන් සමඟ ඵලදායී හමු කිහිපයක් ටෙහෙරානයේ ශ්‍රී ලංකා තානාපති කාර්යාලය විසින් සංවිධානය කරන ලදී. කොවිඩ්-19 වසංගතය හේතුවෙන් අහිතකර බලපෑම් එල්ල වූ ආර්ථික, වෙළඳ සහ සංචාරක අංශ නැවත ඉහළ නැංවීමට ශ්‍රී ලංකා රජය ගෙන ඇති පියවර පිළිබඳව මෙම සාකච්ඡාවේදී අමාත්‍ය ගම්මන්පිල මැතිතුමා විස්තර කළේය.
ඉරාන ඛනිජ තෙල් අමාත්‍යංශය තානාපති කාර්යාලය සමඟ සම්බන්ධීකරණයෙන් යුතුව වී ටෙහෙරාන් ඛනිජ තෙල් පිරිපහදුව සහ Gas Station කෞතුකාගාරය නැරඹීම සඳහා ස්ථාන සංචාරයක් සංවිධානය කළේය. එහිදී අදාළ අංශවල ප්‍රධානීන් විසින් නියෝජිතයන්ව උණුසුම් ලෙස පිළිගනු ලැබීය.
තානාපති ජී. එම්. වී. විශ්වනාත් අපොන්සු මැතිතුමා උදය ගම්මන්පිල මැතිතුමාගේ නායකත්වයෙන් යුක්ත නියෝජිත පිරිස සමඟ හමුවලට සහභාගී වූ අතර, ලේකම් කේ. ඩී. ආර්. ඔල්ගා මහත්මිය සහ ලංකා ඛනිජ තෙල් නීතිගත සංස්ථාවේ නියෝජ්‍ය සාමාන්‍යාධිකාරී මහේන්ද්‍ර ගුරුසිංහ මහතා අවශේෂ නියෝජිත පිරිස වශයෙන් ඊට එක් වූහ.
ශ්‍රී ලංකා තානාපති කාර්යාලය
ටෙහෙරාන්
2021 සැප්තැම්බර් 30 වැනි දින
