ජපානය සඳහා නම් කළ ශ්‍රී ලංකා තානාපති සංජීව් ගුණසේකර මැතිතුමා 2021 ජනවාරි 6 වැනි දින ටෝකියෝ හිදී සිය රාජකාරි භාර ගත්තේය. දෙරට අතර පැවති පසුගිය වසර 69 ක ද්විපාර්ශ්වික සබඳතා තුළ, එතුමා ජපානයේ 17 වැනි ශ්‍රී ලංකා තානාපතිවරයා වේ. නම් කළ තානාපතිවරයා සිය ධුරයේ වැඩ භාර ගැනීමේ අවස්ථාවට බෞද්ධ, හින්දු, ඉස්ලාමීය හා ක්‍රිස්තියානි ආගමික ආශීර්වාද ලබා දීම ද ඇතුළත් විය.
මෙම අවස්ථාව සඳහා සවර ලංකාජි පන්සල, හචියෝජි හි ජාත්‍යන්තර බෞද්ධ මධ්‍යස්ථානය, ෆුජි සුගත සෙනසුන සහ සුකුබා ශ්‍රී සම්බුධාලෝක පන්සලේ නායක ස්වාමීන් වහන්සේලා සහ අනෙකුත් බෞද්ධ භික්ෂූන් වහන්සේලා සහභාගී වූහ. ශ්‍රී සරුජන් සත්‍යමූර්ති, අබ්දුල්ලා ලතීෆ් සහ ආචාර්ය නිම්ෆා ජයමාන්න යන මහත්වරු පිළිවෙලින් හින්දු, ඉස්ලාමීය හා ක්‍රිස්තියානි ආගමික ආශිර්වාදය ලබා දුන්හ. ජපානයේ ශ්‍රී ලංකාව හා සම්බන්ධ සියලුම සංගම්වල ජ්‍යෙෂ්ඨ නිලධාරීහු ද මෙම අවස්ථාව සඳහා සහභාගී වූ අතර, තානාපති කාර්යාලයේ කාර්යය මණ්ඩලය විසින් සංවිධානය කරන ලද පරිදි මහා සංඝ රත්නයට සහ අනෙකුත් ආගමික සම්භාවනීය අමුත්තන්ට දානය පිරිනමන ලදී.
අභිනව නම් කළ තානාපති ගුණසේකර මැතිතුමා, සිය ධූර කාලය තුළ දී ඉටු කිරීම සඳහා අතිගරු ජනාධිපතිතුමා විසින් තමා වෙත පවරා ඇති අරමුණු පිළිබඳව පැහැදිලි කළේය. දෙරටේ ද්විපාර්ශ්වික සබඳතා තවදුරටත් වර්ධනය කිරීම හා පුළුල් කිරීම සහ විශේෂයෙන් ශක්තිමත් ආර්ථික සබඳතා පිළිබඳව ගවේෂණය කිරීම ඔහුගේ කාර්යයේ ප්‍රධාන ප්‍රමුඛතා අතර වේ. ශ්‍රී ලංකාව සඳහා වැඩි වශයෙන් ජපන් ආයෝජන සපයා ගැනීම, ජපානය තුළ රැකියා අවස්ථා ඉහළ නැංවීම, ජපාන සංචාරකයින් ශ්‍රී ලංකාවට ගෙන්වා ගැනීම සහ ජපානය වෙත අපනයනය ඉහළ නැංවීම සඳහා වන තම දැඩි අභිප්‍රායයන් පිළිබඳව නම් කළ තානාපතිවරයා විසින් පැහැදිලි කරන ලදී.
වෘත්තියෙන් ව්‍යාපාරිකයෙකු වන ගුණසේකර මැතිතුමා සතුව එක්සත් ජනපදයේ ලොස් ඇන්ජලීස් හි ව්‍යාපාර කිහිපයක් පවතී. එතුමා එක්සත් ජනපදයේ සහ ශ්‍රී ලංකාවේ බොහෝ පුණ්‍යායතනවල කණ්ඩායම් නායකයෙකු ලෙස කටයුතු කර ඇත. එතුමා විස්කොන්සින් හි බෙලොයිට් විද්‍යාලයෙන් ආර්ථික විද්‍යාව හා කළමනාකරණය පිළිබඳ ශාස්ත්‍රවේදී උපාධිය සහ ජාත්‍යන්තර සබඳතා උපාධිය ලබා ඇති අතර, කැලිෆෝනියා ප්‍රාන්ත විශ්වවිද්‍යාලයෙන් ව්‍යාපාර පරිපාලනය පිළිබඳ ශාස්ත්‍රපති උපාධියක් ද ලබා ඇත.
ශ්‍රී ලංකා තානාපති කාර්යාලය
ටෝකියෝ
2021 ජනවාරි 08 වැනි දින
