இந்தோனேசிய வெளிநாட்டு அலுவல்களுக்கான துணை அமைச்சர் முகமது அனிஸ் மட்டா, வெளிநாட்டு அலுவல்கள் மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திரவின் அழைப்பின் பேரில், 2026 ஏப்ரல் 23 முதல் 25 வரை இலங்கைக்கு உத்தியோகபூர்வ பயணமொன்றை மேற்கொண்டார்.
இவ்விஜயத்தின் போது, துணை அமைச்சர் மட்டா, 2026 ஏப்ரல் 24 அன்று பிரதி அமைச்சர் ஹேமச்சந்திரவுடன் இருதரப்பு கலந்துரையாடல்களை நடத்தினார். இந்தோனேசிய துணை அமைச்சரை வரவேற்ற பிரதி அமைச்சர் ஹேமச்சந்திர, இரு நாடுகளுக்கும் இடையிலான நீண்டகால நட்புறவு குறித்துக் கருத்துத் தெரிவித்ததோடு, இருதரப்பு உறவுகளை மேலும் வலுப்படுத்துவதில் இலங்கையின் உறுதிப்பாட்டையும் மீண்டும் வலியுறுத்தினார். பொருளாதார ஈடுபாட்டை மேம்படுத்துவதன் முக்கியத்துவத்தையும், குறிப்பாக, தற்போதுள்ள வர்த்தக அளவை உயர் நிலைக்கு உயர்த்துவதற்கான வழிகள் மற்றும் முறைகளையும் துணை அமைச்சர் மட்டா குறிப்பிட்டார். எதிர்வரும் ஆண்டுகளில் இருதரப்பு உறவுகளை உக்திசார்ந்ததொரு கூட்டாண்மை நிலைக்கு உயர்த்துவதற்காக, நெருங்கிய ஈடுபாட்டை வளர்க்கும் நோக்கில், இருதரப்பு அரசியல் கலந்தாய்வுகளை முன்கூட்டியே நடத்துவது மற்றும் உயர் மட்டப் பயணங்களைப் பரிமாறிக்கொள்வது ஆகியவற்றின் முக்கியத்துவத்தை இரு தரப்பினரும் ஒப்புக்கொண்டனர். பயன்படுத்தப்படாத ஆற்றலை வெளிக்கொணர்வதற்கான பரந்த நோக்கில், இரு நாடுகளுக்கும் இடையே மக்கள் தொடர்பை மேம்படுத்துதல், கடல்சார் ஒத்துழைப்பு மற்றும் கலாச்சாரப் பரிமாற்றங்கள் ஆகியவற்றை மையமாகக் கொண்ட முன்னெடுப்புகள் குறித்தும் இரு தரப்பினரும் ஆலோசித்தனர்.
துணை அமைச்சர் மட்டா, 2026 ஏப்ரல் 24 அன்று வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத்தை வெளிநாட்டு அலுவல்கள் அமைச்சில் மரியாதை நிமித்தமாக சந்தித்தார். இச்சந்திப்பில், இரு நாடுகளுக்கும் இடையிலான இருதரப்பு அரசியல் கலந்தாய்வுகள் குறித்த புரிந்துணர்வு ஒப்பந்தம் மற்றும் இராஜதந்திர மற்றும் உத்தியோகபூர்வ கடவுச்சீட்டுகளுக்கான விசா விலக்கு ஒப்பந்தம் ஆகியவை தொடர்புடைய செயன்முறைகளின் இறுதிக் கட்டத்தை எட்டியுள்ளதாக இரு தரப்பினரும் குறிப்பிட்டனர். எதிர்காலத்தில் அவற்றை முடிவுக்குக் கொண்டுவரவும், இருதரப்பு அரசியல் கலந்தாய்வுகள் மற்றும் கூட்டு ஆணைக்குழு கூட்டத்தை விரைவில் நடத்தவும் முடியும் என்று அவர்கள் நம்பிக்கை தெரிவித்தனர். பரஸ்பர நலன் சார்ந்த பிராந்திய மற்றும் உலகளாவிய நிகழ்வுகள் குறித்து இரு தரப்பினரும் கருத்துக்களைப் பரிமாறிக்கொண்டதுடன், பிராந்தியத்தில் அமைதி, ஸ்திரத்தன்மை மற்றும் நிலைபேறான அபிவிருத்தியை நிலைநிறுத்துவதற்கான தங்களின் பகிரப்பட்ட ஈடுபாட்டை மீண்டும் வலியுறுத்தினர். 2027-ல் இலங்கைக்கும் இந்தோனேசியாவுக்கும் இடையிலான இராஜதந்திர உறவுகளின் 75-வது ஆண்டு நிறைவை முன்னிட்டு, உயர் மட்டப் பயணங்களைப் பரிமாறிக்கொள்வதன் முக்கியத்துவத்தை இரு தரப்பினரும் புரிந்துகொண்டனர்.
தனது விஜயத்தின் போது, துணை அமைச்சர் மட்டா, புத்தசாசனம், சமய மற்றும் கலாச்சார விவகாரங்கள் அமைச்சர் டாக்டர் ஹினிதும சுனில் செனவியுடனும் சந்திப்பொன்றை நடத்தினார்.
இலங்கைக்கான இந்தோனேசியத் தூதுவர், இந்தோனேசிய வெளிநாட்டு அலுவல்கள் அமைச்சின் சிரேஷ்ட அதிகாரிகள் மற்றும் இலங்கையின் வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சின் சிரேஷ்ட அதிகாரிகள் ஆகியோர் இக்கூட்டங்களில் பங்கேற்றனர்.
வெளிநாட்டு அலுவல்கள், வெளிநாட்டு வேலைவாய்ப்பு
மற்றும் சுற்றுலாத்துறை அமைச்சு|
கொழும்பு
2026, ஏப்ரல் 29
