பெப்ரவரி 26 முதல் 27 வரை ஜெர்மனியின் ப்ரெமனில் நடைபெற்ற ஜெர்மனியின் ஆசிய பசிபிக் வணிக சங்கத்தின் (OAV) 125 ஆவது ஆண்டுநிறைவின் நிமித்தம், கௌரவ விருந்தினராகவும், முக்கிய பேச்சாளராகவும் கலந்துகொள்வதற்காக, இலங்கையின் வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் ஜெர்மனிக்கு விஜயமளித்துள்ள அதேவேளை, ஜெர்மனியை பிரதிநிதித்துவப்படுத்தி, ஜெர்மனியின் வெளிநாட்டு அலுவல்கள் அமைச்சரும் கலாநிதியுமான ஜோஹன் வதேபுலும் கலந்து கொண்டார். இவ்விஜயத்தின் போது, வெளிநாட்டு அலுவல்கள் அமைச்சர் ஹேரத், அமைச்சர் கலாநிதி வதேபுலுடன் இருதரப்பு சந்திப்பொன்றை மேற்கொண்டதுடன், இலங்கை குறித்த வணிக வட்டமேசை மாநாட்டிற்கு தலைமை தாங்கினார்.
யுனெஸ்கோ உலக வரலாற்றுச் சிறப்புமிக்க தளமொன்றாக பட்டியலிடப்பட்ட ப்ரெமன் நகர மண்டபத்தில் நடைபெற்ற ஆசிய பசிபிக் வணிக சங்கத்தின் (OAV) பிரெமன் அலகின் 125வது ஆண்டு விழாவில் ஜெர்மன் அரசியல் மற்றும் வணிகத் தலைவர்கள் மற்றும் வெளிநாட்டு பிரமுகர்கள் மத்தியில் வெளிநாட்டு அலுவல்கள் அமைச்சர் ஹேரத் முக்கிய உரையாற்றினார். பிராந்தியத்தில் இலங்கையின் மூலோபாய அமைவிடம், அதன் விரிவடைந்து வரும் பிராந்திய இணைப்பு, சுதந்திர வர்த்தக ஒப்பந்தங்கள் மற்றும் பிராந்திய கூட்டாளர்களுடனான முன்னுரிமை வர்த்தக ஏற்பாடுகள் மற்றும் உயர் கல்வித்தகைமை பெற்ற தொழிற்படை ஆகியவை தெற்காசியாவில் வர்த்தகம் மற்றும் முதலீட்டிற்கான கவர்ச்சிகரமான இடமாக நாட்டை மாற்றும் காரணிகளில் சிலவாகும் என்று அவர் எடுத்துரைத்தார். துறைமுகங்கள் மற்றும் ஏற்பாட்டியல் துறையுடன் ப்ரெமனின் வலுவான தொடர்புகளைக் கருத்திற்கொண்டு, இத்துறைகளில் இலங்கையின் திறனை ஆராய வணிக சமூகத்தை அமைச்சர் அழைத்தார்.
இந்நிகழ்வின் ஒரு பகுதியாக, வெளிநாட்டு அலுவல்கள் அமைச்சர் ஹேரத், ஜெர்மன் வெளிநாட்டு அலுவல்கள் அமைச்சர் கலாநிதி ஜோஹன் வடேபுல்லுடன் கலந்துரையாடல்களை நடத்தினார். இதில் நீண்டகால இருதரப்பு உறவை மேலும் வலுப்படுத்துதல், வர்த்தகம் மற்றும் முதலீட்டை விரிவுபடுத்துதல், இலங்கையில் சுற்றுலாத் துறையின் வளர்ச்சித் திறன் மற்றும் ஐக்கிய நாடுகள் சபை மற்றும் ஐரோப்பிய ஒன்றியம் உள்ளிட்ட பல்தரப்பு கட்டமைப்புகளுக்குள் ஒத்துழைப்பை மேம்படுத்துதல் ஆகியவை குறித்து கவனம் செலுத்தப்பட்டன. சுற்றுலாத் துறையில் உள்ள கணிசமான திறனைப் பயன்படுத்த மேம்படுத்தப்பட வேண்டிய ஜெர்மன் மொழிப் பயிற்சி, தொழிற்கல்வி மற்றும் திறமையான வேலைவாய்ப்புகள் போன்ற பிரச்சினைகள் குறித்தும் இரு தரப்பினரும் ஆலோசித்தனர்.
பிரெமன் ஆசிய பசிபிக் வணிக சங்கம் மற்றும் ப்ரெமன் வர்த்தக சபை (IHK பிரெமன்) ஏற்பாடு செய்த வணிக வட்டமேசைக் கூட்டத்தில் உரையாற்றிய வெளிநாட்டு அலுவல்கள் அமைச்சர் ஹேரத், இலங்கையின் இணைப்பு மற்றும் பிராந்தியத்தில் வளர்ந்து வரும் சந்தை அணுகல் ஆகியவை அதன் உள்நாட்டு சந்தைக்கு மட்டுமல்லாமல், பரந்த பிராந்திய சந்தைக்கும் வாய்ப்புகளை வழங்குவதாக எடுத்துரைத்தார். இலங்கை ஏற்றுமதி அபிவிருத்தி அதிகாசபையின் தலைவர் மங்கள விஜேசிங்க, தெற்காசியாவில் ஒரு மூலோபாய மூலப் பங்காளியாக இலங்கை என்பது குறித்த விளக்கக்காட்சியை வழங்கியதுடன், எதிர்வரும் இலங்கை எக்ஸ்போ 2026 இல் பங்கேற்குமாறும் அழைப்பு விடுத்தார்.
இவ்விஜயத்தின் போது, வெளிநாட்டு அலுவல்கள் அமைச்சர் ஹேரத், ப்ரெமன் நகரபிதாவும், கலாநிதி ஆண்ட்ரியாஸ் போவன்ஷுல்ட்டையும் சந்தித்தார். வாகனத் தொழில்கள், வர்த்தகம் மற்றும் தளவாடங்கள் உள்ளிட்ட ப்ரெமன் வலுவான நிபுணத்துவம் பெற்ற துறைகள் குறித்து விவாதங்கள் கவனம் செலுத்தின.
ப்ரெமனுக்கு விஜயம் செய்தபோது அமைச்சருடன் ஜெர்மனிக்கான இலங்கை தூதுவர் வருணி முத்துக்குமாரன, இலங்கை ஏற்றுமதி அபிவிருத்தி சபையின் தலைவர் மங்கள விஜேசிங்க மற்றும் பெர்லினில் உள்ள இலங்கை தூதரகத்தின் சிரேஷ்ட அதிகாரிகள் ஆகியோரும் இணைந்து கொண்டனர்.
வெளிநாட்டு அலுவல்கள், வெளிநாட்டு வேலைவாய்ப்பு
மற்றும் சுற்றுலாத்துறை அமைச்சு
கொழும்பு
2026, மார்ச் 04
