ශ්‍රී ලංකාව සහ ඇමරිකා එක්සත් ජනපදය අතර රාජ්‍ය තාන්ත්‍රික සබඳතාවල 75 වැනි සංවත්සරයට සමගාමීව බටහිර වර්ජිනියාවේ භවානා සංගමයේ නිර්මාතෘ අති පූජනීය හේනේපොල ගුණරතන මහ තෙරුන් වහන්සේ විසින් පුරා වසර 55ක කාලයක් ඇමරිකා එක්සත් ජනපදයේ ඉටු කරන ලද ආගමික හා සමාජ සේවය වෙනුවෙන් ගෞරව දැක්වීම සඳහා වොෂින්ටන් ඩී.සී හි ශ්‍රී ලංකා තානාපති කාර්යාලය, භාවනා සංගමය සහ මේරිලන්ඩ් බෞද්ධ විහාරය සමඟ එක්ව 2023 අගෝස්තු 25 දින තානාපති කාර්යාල පරිශ්‍රයේදී උත්සවයක් පවත්වන ලදී. අතිපූජ්‍ය හේනේපොල ගුණරතන නායක නාහිමිපාණන්වහන්සේට ගෞරව පිණිස ශ්‍රී ලංකා ජනාධිපති රනිල් වික්‍රමසිංහ මහතා විසින් අනුමත කරන ලද තැපැල් මුද්දරය සංකේතාත්මකව පිරිනැමීම මෙහි ප්‍රධාන අරමුණ විය.
සාම්ප්‍රදායික පූජා නැටුමකින් අනතුරුව පෙරහැරකින් නාහිමිපාණන්වහන්සේ පිළිගැනීමෙන් උත්සවය ආරම්භ විය. අති පූජ්‍ය ගුණරතන මාහිමිපාණන් වහන්සේ ලොව පුරා බෞද්ධ ධර්ම දූත සේවාවේ පහන් ටැඹ වී ඇති අතර, විශේෂයෙන් එක්සත් ජනපදයේ වෙසෙන ශ්‍රී ලාංකිකයන්ට පමණක් නොව, සත්‍යය සොයන ඇමෙරිකානු ජාතිකයින්ට මෙන්ම ථෙරවාදී බුද්ධ ශාසනයටද අපමණ සමාජ මෙහෙවරක් ඉටු කරමින් සිටින බව තානාපති මහින්ද සමරසිංහ මහතා පිළිගැනීමේ කතාවේදී සඳහන් කළේය. තානාපති කාර්යාල පරිශ්‍රයේ දී උත්සවය පැවැත්වීමට තමන් ගත් තීරණය ද නායක මහා ස්වාමින් වහන්සේ බුද්ධ, ධම්ම, සංඝ රත්නයට කරන ලද ආදර්ශවත් සේවාවට කරන ගෞරවයක් බව ද ඔහු වැඩිදුරටත් සඳහන් කළේය. උන්වහන්සේ අධ්‍යාත්මික උපක්‍රම ප්‍රගුණ කරමින් භාෂා රැසකට පරිවර්තනය වූ පොත්පත් ප්‍රකාශයට පත් කිරීමෙහි ලා උන්වහන්සේ සිදු කළ දැවැන්ත සේවය ද තානාපති සමරසිංහ මහතා අගය කළේය. බෞද්ධ භික්ෂූන් වහන්සේලාට ධර්මය ප්‍රචාරය කිරීමට මෙන්ම අමෙරිකාවේ වෙහෙර විහාර පිහිටුවීමට අවස්ථාව ලබා දීම පිළිබඳව ද තානාපතිවරයා අමෙරිකාව ඇගැයීමට ලක් කළේය.
භාවනා ආරාමය පිහිටුවීම සඳහා දේපළ පරිත්‍යාග කළ සුවිශේෂී බැතිමතෙකු සහ ආරම්භක සාමාජිකයෙකු වන මැතිව් ෆ්ලික්ස්ටයින් සිය ප්‍රධාන දේශනය අතරතුර, එදිනෙදා ජීවිතයේදී සිහිය පුරුදු කරන අතරම ගුණරතන මාහිමිපාණන් බැතිමතුන්ට ධර්මය අවබෝධ කරවීමට උත්සාහ දරන ආකාරය විස්තර කළේය. පූජ්‍ය ඇත්කඳවක සද්ධාජීව, පූජ්‍ය හීන්බුන්නේ කොණ්ඩඤ්ඤ, පූජ්‍ය සූරක්කුලමේ ප්‍රේමරතන ආදී යතිවරයාණන් වහන්සේලා ගුණරතන මාහිමිපාණන් සිදු කළ සුවිශාල සේවාවේ විවිධ පැතිකඩ පිළිබඳව ද ප්‍රකාශ කළ සිටියහ. තානාපති සමරසිංහ මහතා විසින් බෙර වාදන, හේවිසි පූජා මධ්‍යයේ නිල වශයෙන් සමරු මුද්දරය නාහිමියන් වෙත පිළිගන්වන ලදී. අනතුරුව, ඔහු උන්වහන්සේට තානාපතිවරයා සහ තානාපති කාර්ය මණ්ඩලය විසින් සංකේතාත්මක ඇගයීමක් ප්‍රදානය කළේය.
විවිධ ප්‍රාන්තවලින් පැමිණි පනස් නමකට අධික මහා සංඝරත්නය, නියෝජ්‍ය සහකාර ලේකම් අෆ්රීන් අක්තර් ඇතුළු එක්සත් ජනපද රාජ්‍ය දෙපාර්තමේන්තුවේ නිලධාරීහු, රාජ්‍යතාන්ත්‍රික කණ්ඩායම් සාමාජිකයෝ, ඇමෙරිකානු ජාතිකයෝ, ශ්‍රී ලාංකිකයෝ සහ චීන, තායිවාන, බංග්ලාදේශ, බුරුම සහ වියට්නාම ජාතිකයෝ වැනි විවිධ ජාතීන්ට අයත් බැතිමත්හු හා එක්සත් ජනපදයේ බොහෝ ප්‍රදේශවලින් පැමිණි බැතිමත්හු මෙම අවස්ථාවට සහභාගී වූහ. භාවනා සංගමයේ විශේෂ පුවත් පත්‍රිකා සහ ශ්‍රී ලංකා තැපැල් දෙපාර්තමේන්තුවේ මුද්දර කාර්යාංශය විසින් නිකුත් කරන ලද සමරු මුද්දර ද සහභාගි වූවන් අතර බෙදා දෙන ලදී. අතිපූජ්‍ය ගුණරතන මාහිමිපාණන් වහන්සේ විසින් රචිත "Mindfulness in Plain English" කෘතිය එක්සත් ජනපදයේ පිටපත් මිලියන 10 කට වඩා අලෙවි වී ඇත. උත්සවයේ සිටි විශේෂ අමුත්තන්ට මෙම අගනා කෘතියේ පිටපත් ද හිමි විය.
බුරුමය විසින් උන්වහන්සේට පිරිනැමූ අග්ගමහා පණ්ඩිත පදවිය ඇතුළුව උන්වහන්සේගේ සේවය අගයමින් රටවල් කිහිපයකින් ගෞරව පදවි පිරිනමා ඇත. ඇමරිකානු විශ්වවිද්‍යාලයෙන් ශාස්ත්‍රවේදී උපාධිය, ශාස්ත්‍රපති උපාධිය සහ ආචාර්ය උපාධි හැදෑරූ ගුණරතන මාහිමිපාණන්ට එමඟින් උන්වහන්සේගේ දේවධර්මීය සේවය තවදුරටත් පුළුල් කිරීමට හැකි විය.
ඇමරිකානු විශ්වවිද්‍යාලයේ ආයතනික පූජකධූර පදවියෙන් පිදුම් ලැබූ ප්‍රථම බෞද්ධ භික්ෂුව ද උන්වහන්සේ ය. ගුණරතන මාහිමිපාණන් 1982 දී, "භාවනා සමිතිය" නමින් එක්සත් ජනපදයේ පළමු ආරණ්‍ය සේනාසනය (වන සෙනසුන) බටහිර වර්ජිනියා ප්‍රාන්තයේ පිහිටුවන ලදී. වියට්නාම යුද්ධයෙන් පසු ඇමරිකා එක්සත් ජනපදයේ සරණාගතභාවය පතා පැමිණි දහස් ගණන් වියට්නාම ජාතිකයින් පිළිගෙන 1975 දී ඇමරිකා එක්සත් ජනපදයේ රජය විසින් පත් කරන ලද කර්නල්වරයෙකු ලෙස ඔවුන්ට උපදෙස් ලබා දීම ද මාහිමිපාණන් වහන්සේ විසින් සිදු කරන ලදී. ශ්‍යාමෝපාලි මහා නිකායේ මල්වතු මහා විහාරයේ කාරක සංඝ සභාව විසින් 1985 දී උන්වහන්සේ උතුරු ඇමරිකාවේ මහා නායක පදවියෙන් පිදුම් ලද සේක.
ශ්‍රී ලංකා තානාපති කාර්යාලය
වොෂින්ටන් ඩී.සී.
2023 අගෝස්තු 31
