විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා අද දින මියන්මාරයේ නියෝජ්‍ය අග්‍රාමාත්‍ය සහ මධ්‍යම රජයේ විදේශ කටයුතු අමාත්‍ය යූ තාන් ස්වේ මහතා සමඟ දුරකථන සංවාදයක් පැවැත්වූ අතර, එහිදී ව්‍යසනය සම්බන්ධයෙන් ශෝකය පළ කරමින් මෙම අභියෝගාත්මක කාලය තුළ ශ්‍රී ලංකාව දක්වන සහයෝගය අමාත්‍යවරයා යළි තහවුරු කළේය.
මෙම සංවාදය අතරතුර, අමාත්‍ය හේරත් මහතා නිවේදනය කළේ මියන්මාරයට බලපෑ භූමිකම්පාවෙන් සිදු වූ හානි ප්‍රතිසංස්කරණ කටයුතු සඳහා ශ්‍රී ලංකා රජය ඇමරිකානු ඩොලර් මිලියන 1 ක මුදලක් ලබා දීමට පොරොන්දු වී ඇති බවයි. ශ්‍රී ලංකා සන්නද්ධ හමුදාවන්ගෙන් වෛද්‍ය සහ මානුෂීය ආධාර සහ ආපදා සහන කණ්ඩායමක් යෙදවීමටත් විපතට පත් වූවන්ට උපකාර කිරීම සඳහා අත්‍යවශ්‍ය සහන ද්‍රව්‍ය සැපයීමටත් ඇති සූදානම ඔහු ප්‍රකාශ කළේය.
මෙම දුරකථන ඇමතුමෙන් පසුව, විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා 6 වැනි බිම්ස්ටෙක් සමුළුවට සමගාමීව බැංකොක් නුවරදී අමාත්‍ය යූ තාන් ස්වේ මහතා සමඟ සුහද හමුවක් පවත්වනු ඇත.
විදේශ කටයුතු, විදේශ රැකියා සහ සංචාරක අමාත්‍යාංශය
කොළඹ
2025 අප්‍රේල් 02 වැනි දින
