බහු-ආංශික තාක්ෂණික හා ආර්ථික සහයෝගීතාව සඳහා වූ බෙංගාල බොක්ක ආශ්‍රිත රටවල සංවිධානයෙහි (බිම්ස්ටෙක්) සයවැනි සමුළුව සහ එයට සමගාමීව විසිවැනි අමාත්‍ය රැස්වීම සහ විසිපස් වැනි ජ්‍යෙෂ්ඨ නිලධාරීන්ගේ රැස්වීම, 2025 අප්‍රේල් 02 සිට 04 වැනි දින දක්වා තායිලන්තයේ බැංකොක් නුවරදී "සමෘද්ධිමත්, ශක්තිමත් සහ විවෘත බිම්ස්ටෙක් සංවිධානයක්" යන තේමාව යටතේ පැවැත්විණි. තායිලන්ත රාජධානිය විසින් සමුළුවේ මුලසුන දරනු ලැබිණි.
අග්‍රාමාත්‍ය ආචාර්ය හරිනි අමරසූරියගේ නායකත්වයෙන් යුත් සමුළුවට සහභාගී වූ ශ්‍රී ලංකා දූත පිරිසට විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා සහ විදේශ කටයුතු, විදේශ රැකියා සහ සංචාරක අමාත්‍යාංශයේ ජ්‍යෙෂ්ඨ නිලධාරීහු ඇතුළත් වූහ. සාර්ථක සමුළුවක් පැවැත්වීම සහ ඔවුන්ගේ උණුසුම් ආගන්තුක සත්කාරය වෙනුවෙන් තායිලන්ත රජයට සහ අගමැතිනි පෙටොංටාර්න් ෂිනවත්‍රා හට අගමැතිනි අමරසූරිය සිය කෘතඥතාව පළ කළාය.
කලාපීය සහයෝගීතාව වැඩිදියුණු කිරීමේ වැදගත්කම අවධාරණය කළ අග්‍රාමාත්‍යවරිය, විද්‍යාව, තාක්ෂණය සහ නවෝත්පාදන ක්ෂේත්‍රයේ ප්‍රමුඛ රට ලෙස ශ්‍රී ලංකාවේ කැපවීම නැවත අවධාරණය කළාය. කොළඹ බිම්ස්ටෙක් තාක්ෂණ හුවමාරු පහසුකම ක්‍රියාත්මක කිරීම සඳහා ශ්‍රී ලංකාවේ අපේක්ෂාවද ඇය අවධාරණය කළාය.
තවද, අනාගත අභියෝග සඳහා තීරණාත්මක කුසලතාවන්ගෙන් පුරවැසියන් සන්නද්ධ කිරීම අරමුණු කරගත්, මානව සම්පත් සංවර්ධනය සඳහා අලුතින් සකස් කරන ලද ක්‍රියාකාරී සැලැස්මේ වැදගත්කම අග්‍රාමාත්‍යවරිය අවධාරණය කළාය. දිගුකාලීන වර්ධනයට සහ කලාපීය සමෘද්ධියට කේන්ද්‍රීය මානව සම්පත් සංවර්ධනය අවධාරණය කරමින්, එය කඩිනමින් ක්‍රියාත්මක කරන ලෙස ඇය ඉල්ලා සිටියාය.
දිගුකාලීන ගැටලු විසඳීම සඳහා විවෘතභාවය සහ දැනුම බෙදා ගැනීම ඉල්ලා සිටිමින්, වෙළෙඳාම, ආර්ථික සහයෝගීතාව සහ සම්බන්ධතාවේ ප්‍රයෝජනයට නොගත් විභවයන් පිළිබඳව ද අග්‍රාමාත්‍යවරිය පෙන්වා දුන්නාය. එමෙන්ම බිම්ස්ටෙක් සංවිධානයෙහි පුළුල් සහයෝගීතා ඉලක්ක වේගවත් කිරීම සඳහා භෞතික, ඩිජිටල් සහ බලශක්ති සම්බන්ධතාව වැඩිදියුණු කිරීම අත්‍යවශ්‍ය බව ද ඇය සඳහන් කළාය.
විසිවැනි අමාත්‍ය මණ්ඩල රැස්වීමේදී, නියෝජ්‍ය අමාත්‍ය අරුන් හේමචන්ද්‍ර මහතා ශ්‍රී ලංකාව වෙනුවෙන් සමුද්‍රීය සහයෝගීතාව පිළිබඳ බිම්ස්ටෙක් ගිවිසුමට අත්සන් තැබූ අතර, එය වැඩිදියුණු කළ සමුද්‍රීය සහයෝගීතාවේ පියවරකි. බිම්ස්ටෙක් සංවිධානයෙහි ජාත්‍යන්තර හවුල්කාරිත්වයන් ශක්තිමත් කරමින් අයෝරා සහ එක්සත් ජාතීන්ගේ මත්ද්‍රව්‍ය හා අපරාධ පිළිබඳ කාර්යාලය සමඟ අතිරේක අවබෝධතා ගිවිසුම් අත්සන් කරන ලදී.
සයවැනි බිම්ස්ටෙක් ප්‍රකාශනය, 2030 බිම්ස්ටෙක් බැංකොක් දැක්ම, බිම්ස්ටෙක් යාන්ත්‍රණයන් සඳහා වන ක්‍රියා පටිපාටි රීති, බිම්ස්ටෙක්හි අනාගත දිශාව පිළිබඳ කීර්තිමත් පුද්ගලයින් කණ්ඩායමේ වාර්තාව සහ 2025 මාර්තු 28 වැනි දින සිදු වූ භූමිකම්පාවෙන් පසු මියන්මාරය සහ තායිලන්තය සමඟ සහයෝගීතාව ප්‍රකාශ කරන නායකයින්ගේ ඒකාබද්ධ ප්‍රකාශය ඇතුළු වැදගත් ලියකියවිලි කිහිපයක් සම්මත කර ගනිමින් සමුළුව අවසන් විය.
විදේශ කටයුතු, විදේශ රැකියා සහ සංචාරක අමාත්‍යාංශය
කොළඹ
2025 අප්‍රේල් 09 වැනි දින
