ශ්රී ලංකා-බෙල්ජියම් දේශපාලන උපදේශනවල සමාරම්භක සාකච්ඡාව 2026 පෙබරවාරි 17 වැනි අඟහරුවාදා දින බ්රසල්ස් නුවරදී සාර්ථකව පැවැත්වුණු අතර, එය දෙරටේ දිගුකාලීන සම්බන්ධතාවයේ වැදගත් සන්ධිස්ථානයක් සනිටුහන් කළේය. ද්විපාර්ශ්වික සහයෝගීතාව ශක්තිමත් කිරීම, සංවාදය පුළුල් කිරීම සහ නව හවුල්කාරිත්වයන් ගවේෂණය කිරීම සඳහා රජයන් දෙකෙහිම සාමුහික කැපවීම සාකච්ඡාවලින් පිළිබිඹු විය. 2017 දෙසැම්බර් මාසයේදී දේශපාලන උපදේශන සාකච්ඡා පැවැත්වීම සඳහා වන ගිවිසුමට දෙරට අත්සන් තැබීය. ශ්රී ලංකා දූත පිරිසේ නායකත්වය යුරෝපා සහ උතුරු ඇමරිකානු අංශයේ අධ්යක්ෂ ජනරාල් සුගීෂ්වර ගුණරත්න විසින් දරන ලද අතර බෙල්ජියම් දූත පිරිසේ නායකත්වය ආසියා සහ ඕෂනියා අංශයේ ද්විපාර්ශ්වික කටයුතු පිළිබඳ අධ්යක්ෂ ජනරාල් බර්ගිට් ස්ටීවන්ස් විසින් දරන ලදී.
දේශපාලනික මැදිහත්වීම, ඉහළ මට්ටමේ සංචාර, වෙළඳාම, ආයෝජන සහ සංචාරක, ආරක්ෂක සහ සමුද්රීය ආරක්ෂණ සහයෝගීතාව, විද්යාත්මක හා සංස්කෘතික සහයෝගීතාව, ආපදා වැළැක්වීම සහ දේශගුණික ඔරොත්තු දීමේ හැකියාව, හරිත සංක්රාන්තිය සහ බහුපාර්ශ්වික සංසද තුළ සහයෝගීතාවය ඇතුළු ද්විපාර්ශ්වික සබඳතා පිළිබඳ පුළුල් සමාලෝචනයක් දෙපාර්ශ්වයම සිදු කළහ. 2028 දී දෙරට අතර රාජ්යතාන්ත්රික සබඳතා ස්ථාපිත කිරීමේ 75 වන සංවත්සරය සැමරීම කෙරෙහි ද මෙම සාකච්ඡාවේ අවධානය යොමු විය.
වෙළඳාම, සංචාරක ව්යාපාරය සහ හරිත බලශක්තිය, ඖෂධ, තොරතුරු හා සන්නිවේදන තාක්ෂණ (ICT), වරාය සහ සැපයුම් වැනි අංශවල ආයෝජන අවස්ථා කෙරෙහි විශේෂ අවධානයක් යොමු කරමින්, ආර්ථික සබඳතා ශක්තිමත් කිරීම කෙරෙහි ශ්රී ලංකාව දක්වන උනන්දුව මෙහිදී නැවත අවධාරණය කෙරිණි. යුරෝපා සංගමය (EU) තුළ අඛණ්ඩ සහයෝගීතාව, යුරෝපා සංගමයේ GSP+ යෝජනා ක්රමය යටතේ ශ්රී ලංකාවේ මැදිහත්වීම, ණය ප්රතිව්යුහගත කිරීම සහ ජාත්යන්තර මූල්ය අරමුදලේ (IMF) මඟ පෙන්වීම යටතේ ආර්ථික ප්රකෘතිය සඳහා සිදු කෙරෙන ප්රතිසංස්කරණ පිළිබඳව ද දෙපාර්ශවය සාකච්ඡා කළහ. ආර්ථික ප්රකෘතිය සහ ආයතනික ප්රතිසංස්කරණ සඳහා වන ශ්රී ලංකාවේ ප්රයත්නයන් බෙල්ජියම පිළිගත් අතර, යුරෝපා සංගමය සහ අනෙකුත් ජාත්යන්තර වේදිකා තුළ බෙල්ජියමේ සහයෝගය ශ්රී ලංකාව අගය කළේය. මෑත කාලීනව ඇති වූ දිට්වා සුළි කුණාටුවෙන් පසු රට නැවත ගොඩනැගීමේ ක්රියාමාර්ග සඳහා ශ්රී ලංකාව බෙල්ජියමේ සහාය ඉල්ලා සිටියේය.
සැළසුම්සහගත සහභාගීත්වයේ සහ අඛණ්ඩ ප්රගතියේ වැදගත්කම අවධාරණය කරමින්, යහපාලනය, ජාතික සංහිඳියාව සහ නීතියේ ආධිපත්යය තහවුරු කිරීම සඳහා ශ්රී ලංකාව දරන උත්සාහයන් පිළිබඳව මෙහිදී දැනුවත් කිරීමක් සිදු කෙරිණි. කලාපීය සහ ගෝලීය වර්ධනයන් ද සාකච්ඡා කරන ලද අතර, රටවල් දෙකම බහුපාර්ශ්විකත්වය, එක්සත් ජාතීන්ගේ ප්රඥප්තිය සහ ජාත්යන්තර නීතියට ගරු කිරීම කෙරෙහි ඔවුන්ගේ කැපවීම නැවත අවධාරණය කළහ.
දේශගුණික ක්රියාමාර්ග, සමුද්රීය පාලනය, සමුද්රීය ආරක්ෂණය මෙන්ම එක්සත් ජාතීන්ගේ සංවිධානය තුළ එකිනෙකාගේ අපේක්ෂකත්වයන් සඳහා ඇති විය හැකි සහයෝගය වැනි ක්ෂේත්රවල හවුල්කාරී ප්රමුඛතා උපදේශන සාකච්ඡා මගින් ඉස්මතු කරන ලදී. නවීන, විවිධාංගීකරණය වූ හවුල්කාරිත්වයක් පවත්වාගෙන යාමේ වැදගත්කම හඳුනා ගනිමින්, දේශපාලන උපදේශන සාකච්ඡා නිතිපතා අඛණ්ඩව සිදු කරගෙන යාමට දෙපාර්ශ්වයම එකඟ විය. ශ්රී ලංකාව සහ බෙල්ජියම අතර සබඳතා තවදුරටත් ශක්තිමත් කිරීම සඳහා වන හවුල් කැපවීමකින් රැස්වීම අවසන් විය.
ශ්රී ලංකා දූත පිරිසට, බෙල්ජියම, ලක්සම්බර්ග් සහ යුරෝපා සංගමය නියෝජනය කරන ශ්රී ලංකා තානාපති චන්දන වීරසේන සහ බ්රසල්ස් හි ශ්රී ලංකා තානාපති කාර්යාලයේ ජ්යෙෂ්ඨ නිලධාරීහු ඇතුළත් වුහ. බෙල්ජියම් දූත පිරිසට ආසියානු සහ සමුද්රීය කටයුතු දෙපාර්තමේන්තුවේ අධ්යක්ෂ විලියම් ඇසෙල්බෝන් සහ ෆෙඩරල් රාජ්ය සේවා විදේශ කටයුතු, විදේශ වෙළඳ සහ සංවර්ධන සහයෝගීතාවයේ ජ්යෙෂ්ඨ නිලධාරීහු ඇතුළත් වුහ.
විදේශ කටයුතු, විදේශ රැකියා සහ සංචාරක අමාත්යාංශය
කොළඹ
2026 පෙබරවාරි 18 වැනි දින
