විදේශ කටයුතු, විදේශ රැකියා සහ සංචාරක අමාත්යාංශය, අද දින අමාත්යාංශ පරිශ්රයේ පැවති වැදගත් හා ගෞරවනීය උත්සවයකදී, 2026 වර්ෂය සඳහා නිල රාජකාරි කටයුතු ආරම්භ කරන ලදී.
විදේශ කටයුතු, විදේශ රැකියා සහ සංචාරක වැඩබලන අමාත්ය ගරු අරුන් හේමචන්ද්ර විසින් ජාතික ධජය එසවීමෙන් අනතුරුව, ජාතික ගීය ගායනා කිරීමෙන් උත්සවය ආරම්භ විය. රණවිරුවන්ට සහ මාතෘ භූමිය වෙනුවෙන් සිය ජීවිත පරිත්යාග කළ සියලු දෙනාට ගෞරව කිරීම සඳහා මිනිත්තු දෙකක නිශ්ශබ්දතාවයක් පැවත්විණි.
මෙම අවස්ථාවට සහභාගී වූ සියලුම කාර්ය මණ්ඩල සේවක සේවිකාවන් රාජ්ය සේවය වෙනුවෙන් ඔවුන් දක්වන කැපවීම සාමූහිකව නැවත තහවුරු කළ අතර, අඛණ්ඩතාව, වගවීම සහ ජාතියට සේවය කිරීමට ඔවුන් දක්වන කැපවීම, රාජ්ය සේවක දිවුරුම සිංහල සහ දෙමළ භාෂාවලින් කියවීම මඟින් අවධාරණය කළහ.
මෙම උත්සවයේදී, විදේශ කටයුතු, විදේශ රැකියා සහ සංචාරක ලේකම් අරුණි රණරාජ විසින් අමාත්යාංශයේ මෙහෙයුම් සම්බන්ධ කටයුතුවලදී පෙන්නුම් කළ වෘත්තීයභාවය, සියලු අංශවල ඇතුළත්භාවය සහ ආයතනික ප්රතිසංස්කරණයේ වැදගත්කම ඉස්මතු කරන ලදී. සේවා සැපයීම වැඩිදියුණු කිරීම අරමුණු කරගත් පසුගිය වසර පුරා අමාත්යාංශයේ ශක්යතා සංවර්ධන උත්සාහයන් පිළිබඳව ද ඇය සඳහන් කළාය.
මින් අනතුරුව, සංචාරක නියෝජ්ය අමාත්ය ගරු (ආචාර්ය) රුවන් රණසිංහ සහ විදේශ කටයුතු, විදේශ රැකියා සහ සංචාරක වැඩබලන අමාත්ය ගරු අරුන් හේමචන්ද්ර සිය ප්රධාන දේශන පැවැත්වූ අතර, ඔවුහු 2026 වර්ෂය සඳහා අමාත්යාංශයේ උපායමාර්ගික දැක්ම ගෙනහැර දැක්වූහ. විදේශ සබඳතා ශක්තිමත් කිරීම, රැකියා අවස්ථා පුළුල් කිරීම, සංචාරක සංවර්ධනය ප්රවර්ධනය කිරීම සහ දිට්වා සුළි කුණාටුවේ බලපෑම් වලින් අනතුරුව, දැනට ක්රියාත්මක ප්රතිසාධන උත්සාහයන් සම්බන්ධීකරණය කිරීම කෙරෙහි ඔවුන්ගේ අවධානය යොමු විය.
ඉදිරි වසර තුළ, ජාතික අවශ්යතා සාක්ෂාත් කරගැනීමට සහ ඵලදායී රාජ්ය සේවාවක් ලබා දීමට අමාත්යාංශය දක්වන කැපවීම මෙම උත්සවය මඟින් නැවත තහවුරු කරන ලදී.
විදේශ කටයුතු, විදේශ රැකියා සහ සංචාරක අමාත්යාංශය
කොළඹ
2026 ජනවාරි 01 වැනි දින
