ශ්රී ලංකාව 2026 නව වසරට පිවිසෙන මොහොතේදී, ප්රතිපත්තිගරුක ගෝලීය මැදිහත්වීම, ගෞරවනීය විදේශ රැකියා මෙන්ම නවීන හා තිරසර සංචාරක ආර්ථිකයක් තුළින් ජාතිය නැවත ගොඩනැගීම සඳහා අමාත්යාංශය කැපවී සිටින බව අවධාරණය කරමි. මෙය විනයගරුක ප්රතිසංස්කරණයක් සහ නව ආත්ම විශ්වාසයක් සහිතව නැගී සිටිය යුතු අවස්ථාවක් වේ.
ද්විපාර්ශ්වික සහ බහුපාර්ශ්වික හවුල්කාරිත්වයන් ශක්තිමත් කරමින්, ජාත්යන්තර විශ්වාසය යළි දිනා ගනිමින් සහ රට විශ්වාසදායක සහ ඵලදායී ගෝලීය හවුල්කරුවෙකු ලෙස ස්ථානගත කරමින්, අපි ශ්රී ලංකාවේ විදේශ ප්රතිපත්තිය පැහැදිලිව හා සමබරව ඉදිරියට ගෙන යන්නෙමු. වත්මන් රාජ්යතාන්ත්රික ප්රයත්න ආර්ථිකය යථා තත්ත්වයට පත් කිරීම, ආයෝජන ආකර්ෂණය කර ගැනීම, වෙළෙඳ මාර්ග විවෘත කිරීම සහ ජාතික අවශ්යතා ආරක්ෂා කිරීම සඳහා සෘජු සහය ලබා දිය යුතුය.
විදේශ රැකියා අපගේ ආර්ථිකයේ වැදගත් අංගයක් ලෙස පවතියි. 2026 වසරේදී, අමාත්යාංශයේ ප්රමුඛතාව වන්නේ විදේශයන්හි සිටින ශ්රී ලාංකික සේවකයින් ආරක්ෂා කිරීම, ආරක්ෂිත සහ නීත්යානුකූල සංක්රමණ මාර්ග පුළුල් කිරීම, කුසලතා හඳුනා ගැනීම, වැඩිදියුණු කිරීම සහ විදේශයන්හි සේවය කරන සෑම ශ්රී ලාංකිකයෙකුටම ගෞරවය, සුභසාධනය සහ සාධාරණ සැලකීම සහතික කිරීමයි. මනාව පුහුණුව ලත් සහ ආරක්ෂිත ශ්රම බලකායක්, ප්රේෂණ ප්රවාහ වැඩි දියුණු කරන අතර ජාතික වශයෙන් වන විශ්වසනීයත්වය ඉහළ නංවයි.
මේ වන විට සංචාරක ව්යාපාරය ගුණාත්මකභාවය, තිරසාරභාවය සහ ඔරොත්තු දීමේ හැකියාව යන අංශ හරහා නැවත ස්ථානගත වෙමින් පවතියි. ශ්රී ලංකාවේ ජාත්යන්තර සන්නාමය ප්රචලිත කරන අතරතුරම, ප්රජාවන් ආරක්ෂා කරන සහ පාරිසරික හිතකාමී සංචාරක ව්යාපාරයක් තුළින් පාර්ශවයන්ට ඉහළ වටිනාකමක් ලබා දෙමින්, කලාපීය සමතුලිතතාව සහ ගෝලීය ප්රමිතීන් පවත්වා ගැනීම කෙරෙහි අපගේ ප්රමුඛතාව පවතියි.
ශ්රී ලංකාව නැවත ගොඩනැගීම සඳහා ආයතනික ශක්තිය, පිරිසිදු රාජ්ය පාලනය සහ ලෝකය සමඟ ක්රියාකාරී සම්බන්ධතාවක් අවශ්ය වේ. රජයේ දැක්මෙන් මඟ පෙන්වනු ලබන මෙම අමාත්යාංශය, 2026 වසරේදී සහ ඉන් ඉදිරියටද සංවර්ධනය, අවස්ථා සහ දිගුකාලීන ජාතික ස්ථාවරත්වය සුරක්ෂිත කිරීම සඳහා ජාත්යන්තර හවුල්කරුවන්, පෞද්ගලික අංශය සහ ශ්රී ලාංකික ඩයස්පෝරාව සමඟ අඛණ්ඩව කටයුතු කරනු ඇත.
විජිත හේරත්
විදේශ කටයුතු, විදේශ රැකියා සහ සංචාරක අමාත්ය
ශ්රී ලංකාව
