ප්‍රංශයේ සෞඛ්‍ය මාර්ගෝපදේශවලට අනුගත ව තානාපතිනිය, රාජ්‍ය තාන්ත්‍රික නිලධාරීන් සහ තානාපති කාර්යාල කාර්ය මණ්ඩල සාමාජිකයින්ගේ සහභාගිත්වයෙන් නව වසරේ පළමු රාජකාරි දින සැමරුම් උත්සවය පෙරවරු 9.00 ට තානාපති කාර්යාල පරිශ්‍රයේදී පැවැත්විණි.
උත්සවයේ සමාරම්භය සනිටුහන් කරමින් යුනෙස්කෝ සංවිධානයේ ශ්‍රී ලංකා නිත්‍ය නියෝජිත තානාපතිනි මහාචාර්ය ක්ෂණිකා හිරිඹුරේගම මැතිණිය විසින් ජාතික ධජය ඔසවන ලදි.
තානාපති කාර්ය මණ්ඩලයේ සාමාජිකයින් විසින් ජාතික ගීය ගායනා කිරීමෙන් අනතුරුව මාතෘභූමිය වෙනුවෙන් දිවිපිදූ රණවිරුවන් සහ සෙසු නිලයන් අනුස්මරණය කරමින් විනාඩි දෙකක නිශ්ශබ්දතාවයක් පැවැත්වී ය.
මෙම අවස්ථාවේ දී රාජ්‍ය සේවයේ දිවුරුම/ප්‍රතිඥාව සිංහල, දෙමළ සහ ඉංග්‍රීසි යන භාෂා ත්‍රිත්වයෙන් ම ඉදිරිපත් කෙරිණි.
ඉන් අනතුරුව තානාපති කාර්යාලීය කාර්ය මණ්ඩලය ඇමතූ තානාපතිවරිය සිය කාර්ය මණ්ඩලය විසින් ලබාදුන් අනර්ඝ සේවාව සඳහා සිය කෘතඥ පූර්වක ස්තුතිය පිරිනැමූ අතර එම උද්‍යෝගිමත් බව සෞභාග්‍යයේ දැක්ම නම් ජනාධිපතිතුමාගේ ප්‍රතිපත්ති ප්‍රකාශයට අනුව සකස් කරන ලද 2022 වර්ෂය සඳහා වූ ක්‍රියාකාරී සැලැස්ම මත පදනම්ව 2022 වර්ෂයේ දී ද ඉදිරියට පවත්වා ගෙන යන ලෙස ඉල්ලා සිටියාය.
දූත මණ්ඩලයේ පළමු ලේකම් ලුතිනන් කර්නල් චූලා රත්නායක මහතා විසින් නව වසර සඳහා සිය හෘදයාංගම ශුභාශිංසන මෙන් ම ජනාධිපතිතුමන්ගේ නව වසරේ සුබ පැතුම් පණිවුඩය දමිළ භාෂාවෙන් ඉදිරිපත් කරමින් රැස්ව සිටි පිරිස අමතනු ලැබීය.
කිරිබත් සහ ශ්‍රී ලාංකීය රසකැවිලි සංග්‍රහයෙන් අනතුරු ව මෙම උත්සවය නිමාවට පත් විය.
ශ්‍රී ලංකා තානාපති කාර්යාලය
පැරීසිය
2022 ජනවාරි 04 වැනි දින
