සභාපතිතුමනි,
ශ්‍රී ලංකාව පිළිබඳ 46/1 දරන යෝජනාව බෙදී ගිය ඡන්දයකින් මෙම කවුන්සිලයේ දී සම්මත විය. එහි ගැඹුරු දෝෂ සහිත ක්‍රියා පටිපාටිය සහ පිළිගත නොහැකි අන්තර්ගතය, විශේෂයෙන් ඊනියා සාක්ෂි රැස් කිරීමේ යාන්ත්‍රණයක් සම්බන්ධයෙන් එහි OP 6 ඡේදය සමඟ මූලික වශයෙන් එකඟ නොවීම මත ශ්‍රී ලංකාව සහ අනෙකුත් සාමාජික රටවල් මෙම යෝජනාවට විරුද්ධ විය. මෙම යෝජනාව කවුන්සිලයේ අපක්ෂපාතීත්වය, වාස්තවිකත්වය සහ තෝරා නොගැනීම යන මූලික මූලධර්මවලට සෘජුවම පටහැනි විය. එය එක්සත් ජාතීන්ගේ මහා මණ්ඩල යෝජනා අංක 60/251 මගින් සාමාජික රටවල් විසින් ලබා දුන් වරම විශාල වශයෙන් ඉක්මවා ගියේය. මේ සම්බන්ධයෙන් ශ්‍රී ලංකාවේ මතය මා මාර්තු 01 වැනි දින මෙම කවුන්සිලයට ප්‍රකාශ කොට ඇත. මහ කොමසාරිස්වරියගේ වාර්තාව පිළිබඳ අපගේ අදහස් ද අපි කාලානුරූපී ලෙස ඉදිරිපත් කළෙමු. මහ කොමසාරිස්වරියගේ ලිඛිත යාවත්කාලීන කිරීම සමඟ මෙය එකවර ප්‍රකාශයට පත් කිරීමට ලේකම් කාර්යාලය අපොහොසත් වීම පිළිබඳව කණගාටුවෙන් යුතුව සටහන් කරමු.
අප මෙම යෝජනාව ප්‍රතික්ෂේප කළද, අපගේ මානව හිමිකම් පිළිබඳ ස්වේච්ඡා ජාත්‍යන්තර වගකීම් සහ මෙම කවුන්සිලය ඇතුළුව එක්සත් ජාතීන්ගේ සංවිධානය සමඟ සම්බන්ධ වීම අපි අඛණ්ඩව ඉදිරියට ගෙන යන්නෙමු. 2022 ජනවාරි 18 වැනි දින ශ්‍රී ලංකාවේ ජනාධිපති ගෝඨාභය රාජපක්ෂ මැතිතුමා අපගේ පාර්ලිමේන්තුව වෙත ප්‍රකාශ කළ පරිදි, “අපි ජාත්‍යන්තර නීති සහ සම්මුතිවලට ගරු කරන ජාතියක් වෙමු”. අපි අපගේ ප්‍රගතිය සහ අභියෝග මෙම කවුන්සිලය සහ එක්සත් ජාතීන්ගේ පද්ධතියේ අනෙකුත් අදාළ ආයතන සමඟ අවංක හා විවෘත හුවමාරුවක දී නිතිපතා බෙදාහදාගෙන ඇත්තෙමු.
මහ කොමසාරිස්වරිය මෙම සභාවට ඉදිරිපත් කළ වාර්තාවේ බරපතළ විෂමතා සහ දුර්වලතා තිබෙන බව අප විසින් අවබෝධ කොට ගෙන ඇත. එහි මූලික ඌනතාවය වන්නේ, අපේ රටේ ජනතාව විසින් පිට පිට මැතිවරණ තුනකදී අතිමහත් ලෙස වරම් ලබා දී ඇති ශ්‍රී ලංකා රාජ්‍යයේ අංගවල මූලික ක්‍රියාකාරකම් සහ වගකීම්වලට බලපාන ලෙස එහි පවතින නොඉවසිය හැකි ආක්‍රමණශීලී ස්වභාවයයි. වෙනත් ඕනෑම සාමාජික රාජ්‍යයක් සම්බන්ධයෙන් ද එවැනිම විමර්ශන ක්‍රියා පටිපාටියක් ආරම්භ කිරීම සඳහා මෙම කවුන්සිලය නිසැකවම භාර නොගනු ඇති බැවින්, මෙහි පැහැදිලිව හඳුනාගත හැකි වෙනස් කොට සැලකීමේ අංගයක් ද පවතී. මෙයම, එක්සත් ජාතීන්ගේ පද්ධතියේ පදනමේ මූලයටම පහර දෙයි. ඔවුන්ගේ රටවල ප්‍රමාණය හා බලපෑම කුමක් වුවද, එක්සත් ජාතීන්ගේ සහෝදරත්වයේ සියලුම සාමාජිකයින්ගේ ස්වෛරී සමානාත්මතාවයට අදාළ අත්‍යවශ්‍ය මූලධර්මයට ස්ථිරව අනුකූලව, සාමාජික රටවලට මහ කොමසාරිස්වරිය විසින් අදාළ කරන ලද ප්‍රමිතිවල ඒකාකාරිත්වය සහ අනුකූලතාව පිළිබඳ කරුණ, මෙම වාර්තාවේ කොටස් කිහිපයක් මඟින් නින්දා සහගත ලෙස උල්ලංඝනය කොට ඇත.
අපගේ මනසට මෙය විශේෂයෙන් කැළඹිලි සහගත වන්නේ, එක්සත් ජාතීන්ගේ සහ විශේෂයෙන්ම මානව හිමිකම් කවුන්සිලයේ ශක්තිය සහ කීර්තිය ලැබෙන්නේ සමස්තයක් ලෙස කවුන්සිලයේ ආකල්පවලට යටින් පවතින සදාචාරාත්මක හා සදාචාරාත්මක පදනම පිළිබඳව ජාත්‍යන්තර ප්‍රජාවගේ පුළුල් සැලකිල්ල මත බැවිනි. විශේෂයෙන්ම මෙම කවුන්සිලයේ පූර්වගාමියා වූ මානව හිමිකම් කොමිසමට අත්ව ඇති ඉරණම සම්බන්ධයෙන් සලකා බලා, මෙම විශ්වාසය නොබිඳී තබා ගැනීම ඉතා වැදගත් බව අපි දැඩිව විශ්වාස කරමු. පදනම් විරහිත චෝදනා සහ භෞමික තත්ත්වයන්ගේ සංකීර්ණත්වය පිළිබඳව සංවේදී නොවන මතුපිටින් එළැඹුණු නිගමන රැසක් මෙම වාර්තාව තුළට පැමිණීම බලවත් කණගාටුවට කරුණකි. අපි මෙම කරුණු පිළිබඳව අපගේ ලිඛිත ප්‍රතිචාරයේ දී පුළුල් ලෙස විස්තර කොට ඇත.
ශ්‍රී ලංකා ආණ්ඩුක්‍රම ව්‍යවස්ථාවේ සහ නීති පද්ධතියේ අනුග්‍රහය යටතේ ක්‍රියාත්මක වන, පොහොසත් සහ විවිධ සංස්කෘතික උරුමයන්ගෙන් පැන නගින සහ දැඩි සමාලෝචන ක්‍රියාවලීන්ට යටත් වන, කාලයේ පරීක්ෂාවට ලක් වූ අපගේ නීතිරීතිවල අනිවාර්ය අංගයක් වන අපේ රටේ මූලික ආයතන වෙත මහ කොමසාරිස්වරිය විසින් එල්ල කරන ලද අනවශ්‍ය ප්‍රහාරයෙන් අපි කැළඹීමට පත් වන්නෙමු.
පෙර නොවූ විරූ අර්බුදකාරී අවස්ථාවක දී සමස්ත මානව වර්ගයාටම ප්‍රශස්ත ප්‍රතිලාභ අත්කර ගැනීම සඳහා පවතින දැඩි ලෙස සීමිත සම්පත් මේ අයුරින් භාවිතා කිරීම පිළිබඳ ප්‍රශ්නය ද මෙහි පවතී. පක්ෂග්‍රාහී සහ නිශ්චිතවම ඉලක්ක කරගත් ලෙස ශ්‍රී ලංකාව ලුහුබැඳීම සඳහා සිදුකළ ඩොලර් මිලියන ගණනක දැවැන්ත වියදම, මෙම පැහැදිලි අත්‍යාවශ්‍ය කරුණ සඳහා කිසිසේත්ම අනුකූල නොවේ. මේ මොහොතේ තීරණාත්මක ලෙස වැදගත් බවට පුළුල් පරාසයක ජාතීන්ට පෙනීයන මෙම සලකා බැලීම් සම්බන්ධයෙන් මෙම වාර්තාව මඟින් අල්ප සැලකිල්ලක් දැක්වීම අපට මහත් කණගාටුදායක කරුණක් ලෙස පෙනී යයි.
අපගේ ජනතාව සඳහා අප විසින් ප්‍රතිෂ්ඨාපනය කොට ඇති ආරක්‍ෂාව සහ ස්ථාවරත්වය පවත්වාගෙන යාමටත්, තිරසාර ප්‍රගතිය සාධාරණ ලෙස තහවුරු කිරීමටත් ශ්‍රී ලංකා රජය දැඩි ලෙස අධිෂ්ඨාන කොට ඇත. ඉදිරි අභියෝගවලට මුහුණ දීම සඳහා සමානාත්මතාවයේ සහ අන්‍යෝන්‍ය ගෞරවයේ පදනම මත හවුල්කරුවන් ලෙස අප හා එක්වන ලෙස කෙරෙන අවංක උපදේශය සමඟ මගේ රට ජාත්‍යන්තර ප්‍රජාව වෙත එළඹෙයි.
ස්තූතියි සභාපතිතුමනි.
