ජකර්තා හි ශ්‍රී ලංකා තානාපති කාර්යාලය ශ්‍රී ලංකා සංචාරක ප්‍රවර්ධන කාර්යංශය (SLTPB) සහ ඉන්දුනීසියානු වාණිජ හා කර්මාන්ත මණ්ඩලය (KADIN) සමඟ එක්ව සංචාරක ව්‍යාපාරය ප්‍රවර්ධනය කෙරෙන වෙබිනාර් සාකච්ඡාවක් ඉන්දුනීසියාවේ සංචාරක නියෝජිතයන් සඳහා 2021 දෙසැම්බර් 14 වැනි දින සංවිධානය කළේය. ඇමරිකානු ඩොලර් ට්‍රිලියන 1 ක දළ දේශීය නිෂ්පාදිතයක් මිලියන 270 කට වඩා වැඩි ජනගහණයක් සහ වර්ධනය වෙමින් පවතින මිලියන 180 ක මධ්‍යම පන්තියකින් සමන්විත ඉන්දුනීසියාව ලොව විශාලතම ජනගහණයක් සහිත රටවල් අතරින් සිව්වැනි ස්ථානය හිමි කරගෙන ඇත . සිය ආරම්භක දේශනය ඉදිරිපත් කළ ඉන්දුනීසියාවේ ශ්‍රී ලංකා තානාපතිනි යසෝජා ගුණසේකර මැතිණිය ශ්‍රී ලංකාව මගින් විචක්ෂණශීලී සංචාරකයන්ට ලබා දෙන සුවිශේෂී අත්දැකීම් කෙටියෙන් පෙන්වා දුන් අතර ඉන්දුනීසියාවේ මිත්‍රශීලී අසල්වැසියා වන ශ්‍රී ලංකාව ඉන්දුනීසියාව තුළ ක්‍රියාකාරීව ප්‍රවර්ධනය කරන ලෙස ඉන්දුනීසියානු සංචාරක නියෝජිතයන්ට ආරාධනා කළාය.
ශ්‍රී ලංකාවේ සංචාරක ව්‍යාපාරය පිළිබඳව ඉන්දුනීසියානු සංචාරක නියෝජිතයන් දැනුම්වත් කිරීම සඳහා වේදිකාවක් නිර්මාණය කිරීමට තානාපති කාර්යාලය ක්‍රියාත්මක කළ මෙම මුලපිරීම අගය කළ සංචාරක ව්‍යාපාරය සඳහා වන KADIN ඉන්දුනීසියා හි උප සභාපතිනි ආචාර්ය සතිති හන්දිනී මහත්මිය ලොව පුරා සංචාරය කරන ඉන්දුනීසියානුවන් ශ්‍රී ලංකාව පිරිනමන ආකර්ෂණීය ස්ථානවල සංචාරය කිරීමට උනන්දු වන බව පැවසී ය.
ශ්‍රී ලංකා සංචාරක ප්‍රවර්ධන කාර්යංශයේ කළමනාකාර අධ්‍යක්ෂවරිය වන පද්මා සිරිවර්ධන මහත්මිය වසංගත තත්ත්වය සම්බන්ධයෙන් ශ්‍රී ලංකාව තුළ පවත්නා වත්මන් තත්ත්වය පිළිබඳව ඉදිරිපත් කළ අතර එමගින් වසංගත තත්ත්වය තුළ ශ්‍රී ලංකාවට පැමිණීමට අපේක්ෂා කරන සංචාරකයන් තුළ විශ්වාසයක් ඇති කෙරිණි. සිය ඉදිරිපත් කිරීම සිදු කළ ශ්‍රී ලංකා සංචාරක ප්‍රවර්ධන කාර්යංශයේ අලෙවි අධ්‍යක්ෂ දුෂාන් වික්‍රමසූරිය මහතා සංචාරකයන් සඳහා වෙන්වූ ආකර්ෂණීය ගමනාන්ත හිමිවන පහසුකම් සහ ජාත්‍යන්තර හවුල්කාරිත්වය ඇතුළුව ශ්‍රී ලංකාවට පැමිණෙන සංචාරකයන්ට අත්විඳිය හැකි අද්විතීය අත්දැකීම් පිළිබඳව විස්තර කළේය.
ශ්‍රී ලංකා අභ්‍යන්තර සංචාරක ක්‍රියාකරුවන්ගේ සංගමයේ (SLAITO) කමිටු සාමාජික පැඩී පෝල් මහත්මිය සහ සංචාරක ව්‍යාපාරය සඳහා වන කුඩා හා මධ්‍ය පරිමාණ ව්‍යවසාය සංගමයේ (ASMET) සාමාජික රොහාන් අබේවික්‍රම මහතා යනාදීහු මෙම සංගම් සමඟ සම්බන්ධ වන ලෙස ඉන්දුනීසියානු සංචාරක නියෝජිතයන්ට ආරාධනා කළ අතර සහභාගිවන්නන් නැගූ ප්‍රශ්නවලට ද පිළිතුරු ලබා දුන්හ.
මෙම අවස්ථාවට ජකර්තා හි ශ්‍රී ලංකා තානාපති කාර්යාලය නියෝජනය කරමින් එහි පළමු ලේකම් දිලිනි ජයවර්ධන මහත්මිය, තෙවැනි ලේකම් (වාණිජ) හේෂානි ප්‍රේමතිලක මහත්මිය, රාජ්‍ය සබඳතා නිලධාරිනී ජෙනේසා ලාහෝප් මහත්මිය සහ රාජ්‍යතාන්ත්‍රික විධායක නිලධාරී ෆෙබ්‍රි ෆලාහුදීන් මහතා සහභාගී වූ අතර ශ්‍රී ලංකා සංචාරක ප්‍රවර්ධන කාර්යංශයේ කනිෂ්ඨ කළමනාකාරිනී දිලුක්ෂි වික්‍රමසිංහ මහත්මිය ද ඊට එක් වූවාය.
ශ්‍රී ලංකා තානාපති කාර්යාලය
ජකර්තා
2021 දෙසැම්බර් 24 වැනි දින
