දකුණු ආසියා හදිසි සැපයුම් සංචිතය විවෘත කිරීම ඉකුත් 9 වනදා චීනයේ චෙංඩුහිදි සිදු විය.මේ අවස්ථාවට චීනයේ ශ්‍රී ලංකා තානාපති ආචාර්ය පාලිත කොහොන මැතිතුමා සහභාගී විය. මෙම හදිසි සංචිතය,පසුගිය අප්‍රේල් මාසයේ දී විදේශ අමාත්‍ය වැන්ග් යී මැතිතුමා විසින් කැඳවන ලද ඇෆ්ඝනිස්ථානය, නේපාලය, පාකිස්තානය , බංග්ලාදේශය සහ ශ්‍රී ලංකාව යන විදේශ අමාත්‍යවරුන් සහභාගී වූ සූම් රැස්වීමක ප්‍රතිඵලයකි. ස්වාභාවික ආපදාවන් දකුණු ආසියානු කලාපයට නිතර බලපාන බැවින්, මෙම හදිසි සංචිතය නිර්මාණය කිරීමෙන් අවම ප්‍රමාදයකින් යුතුව හදිසි සැපයුම් යැවීමට සංචිතයට හැකි වේ. වර්තමානයේ දී හදිසි සැපයුම් බලමුලු ගැන්වීම සඳහා වැඩිපුර කාලයක් ගතවේ.
කොළඹ හිටපු තානාපති, උප විදේශ අමාත්‍ය වු ජියැංහාවෝ මැතිතුමා මෙම උත්සවයේ මුලසුන දැරීය.සිචුවාන් හි උප ආණ්ඩුකාරවරයා සහ චෙංඩු හි නගරාධිපතිවරයා මෙම අවස්ථාව සඳහා සහභාගී වූහ.
ආචාර්ය කොහොන මැතිතුමා සිය අදහස් දක්වමින්, දකුණු ආසියාව නිරන්තරයෙන් ස්වාභාවික විපත් වලින් පීඩා විඳින බවත් හදිසි සංචිතය ඒ සඳහා කදිම ප්‍රතිචාර යාන්ත්‍රණයක් සහ සම්පතක් වනු ඇති බවත් පැවසීය. දේශගුණික විපර්යාසයන් හේතුවෙන් අනපේක්ෂිත හා අසාමාන්‍ය කාලගුණයක් සහිත අවස්ථා වැඩි වැඩියෙන් ඇති වීම නිසා හදිසි සංචිතය නිර්මාණය කිරීම කාලෝචිත වේ. ජනාධිපති ෂී ජින් පිං මැතිතුමා 2060 වන විට චීනය කාබන් රහිත කිරීම සඳහා කැපවී ඇති අතර, දේශගුණික විපර්යාස සම්බන්ධයෙන් ලෝකයේ ප්‍රතිචාරය සඳහා ආදර්ශය මඟින් නායකත්වය දුන්නේය. චීනය ලෝකයට ආදර්ශයක් විය. චීන කොමියුනිස්ට් පක්ෂය ආදර්ශවත් නායකත්වයක් ලබා දුන්නේය.
කොවිඩ්-19 වසංගත තත්ත්වය පාලනයෙන් ගිලිහී යමින් පැවතිය දී එන්නත් ලබා දීම සඳහා ශ්‍රී ලංකාවේ ආධාරයට පැමිණීම පිළිබඳව ආචාර්ය කොහොන මැතිතුමා චීනයට ස්තූති කළේය. හොඳින් බලමුලු ගැන්වී ඇති මහජන සෞඛ්‍ය සේවා අංශයක් ශ්‍රී ලංකාව තුළ පවතින අතර එමඟින් ජාතික කොවිඩ්-19 ප්‍රතිචාරය පිළිබඳ බරපතලකම දරා ගනු ලැබේ. ශ්‍රී ලංකාව තුළ වසංගත තත්ත්වය ප්‍රමාණවත් ලෙස පාලනය කළ පසුව, එම සම්පත ලෝකය සමඟ බෙදාහදා ගැනීමට ශ්‍රී ලංකාවට හැකි වනු ඇත.
ශ්‍රී ලංකා තානාපති කාර්යාලය
බීජිං
2021 ජූලි 14 වැනි දින
